點滴

實習的日子還好，但預見了正職老師的工作量，已經覺得好累。每天5.45起床，7.45前打卡，然後開始當值、早會，再上上上上課。午飯時間嗎？要與小不點們陪吃，每吃二口、罵二句（「你企喺食飯㗎？」「你食食吓點解會走咗去人地個位㗎？」「紙巾用嚟掟㗎咩！」）。同時加映：「Miss Hui！佢講粗口啊！佢講s字頭嗰個粗口啊」、「佢攞咗我支叉」⋯⋯

我原任老師通常都要學生飯後自動自覺做預默，所以當我的飯盒還剩一大半，他們已經一個個交上默書紙。然後tick tick tick，有錯字，再默一次，我吃一口飯，另一個又回來「Miss Hui，"Be Supportive!" 算唔算一句啊？譚Sir 話可以一句句默」。⋯⋯算⋯但兩個字你就來要我改一次，小朋友，把這句跟下句合在一齊寫真的很難嗎？

結果，午飯時間完了，我還未把我的西芹吃光光。